DAHİ REJİSSOR VƏ "YARAMAZ" TELEVİZİYA RƏHBƏRİ

16:30 / 06.02.2021

Nadir Qocabəyli

Vaqif Mustafayev qabiliyyətli adam, istedadlı rejissordur, hətta dahidir. Onun çəkdiyi bütün filmlər sarkastik-simvolik parodiya janrındadır. O hamını və hər şeyi lağa qoyur... Amma günlərin birində anladı ki, onun matahı üçün bu ölkədə bazar yoxdur. Odur ki, başqa bir adam roluna girdi. Onun "Yaramaz" filmini xatırlayırsınz da. Bax, Vaqif həmin o yaramazın rolunu həyatda oynamağa başladı. Çünki yaşamaq, ailəni saxlamaq, övladları bir yerə çıxartmaq lazım idi. Bunu isə yaramazlıq etmədən reallaşdırmaq çox çətindir.
Yadınızdadır, bir ara hamı onun Heydər Əliyevin məzarı qarşısında ikiqat bükülmüş şəklini paylaşır, bu hərəkəti yaltaqlığın pik nöqtəsi adlandırırdı. Feysbuk qəhrəmanları burada əməlli-başlı şadyanalıq qurmuşdular. O zaman düşündüm ki, axı bunu Vaqifdən tələb edən yoxdur, əksəriyyət kimi yüngülvarı təzim edə bilərdi. Və dərhal ağlıma gəldi ki, bu sadəcə parodiyadır. Vaqif bununla nəsə demək istəyir və deyir...
Bu gün onu işdən çıxarıblar. Kanalın sahibi Sevil xanım Əliyeva bildirib ki, son zamanlar ondan çoxlu şikayət vardı, camaat "Space"dən narazılıq edirdi. Odur ki, getməliydi. Sevil xanım onu da bildirib ki, kanalı ancaq Azərbaycanda olanda bir neçə dəfə izləyib. Odur ki, sadəcə ictimai rəyi nəzərə alaraq bu addımı atıb. Məncə, ictimai rəyə görə bu ölkədə fərli-başlı televiziya yerli-dibli yoxdur. Hərçənd, Sevil xanımdan fərqli olaraq, mən daim Bakıda yaşayıram, bununla belə televizora baxmıram... Nə speysə, nə də digərlərinə...
Vaqifi ancaq filmlərindən tanıyıram, həyatda necə adam olduğunu bilmirəm. Bəlkə də, heç mənim standartlarımca "yaxşı oğlan" deyil. Lap çoxdan bircə dəfə televiziya müsahibəsinə baxmışam. Maraqlı insan təsiri bağışlayıb...
Ondan yaxşı televiziya rəhbəri olardımı? Məncə, hə. Bəs niyə olmadı? Çünki Vaqif bu ölkədə yaxşı mütəxəssisin, müəllimin, həkimin, rejissorun, məmurun, rəhbərin, hətta nazirin heç kəsə lazım olmadığını çoxdan anlamışdı. Odur ki, özünü qoymuşdu "yaramazlığa". Efiri tapşırmışdı istedadsız, piyada adamlara. Onlar da vaxtı doldurmaq üçün hind kinosundan-zaddan fırladırdılar. Özü də, Allah bilir, nəylə məşğul imiş. Hamı kimi puldan-paradan qapazlayıb yaşayır, özünə, ailəsinə gün ağlayır, gələcək ssenariləri üçün material və resurs toplayırmış. Bir də görəcəksiniz, bir şedevr çəkib, Oskardan-zaddan aldı. Onda hamınız onu lağa qoyduğunuza görə peşman olacaqsınız. Çünki Azərbaycanın adını dünyaya duyuracaq, bayrağımızı dalğalandıracaq və eyni zamanda, şöhrətin zirvəsindən bizlərə baxıb deyəcək: "ay sizi, yaramazlar..."

DAHİ REJİSSOR VƏ "YARAMAZ" TELEVİZİYA RƏHBƏRİ

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə