Bacısını öldürən qız günahını Allahın üstünə ataraq qeyd edir ki...

 Bu gün Avropa  biz müsəlmanlara bir çox batil idelogiyalar gətirdi ki, bunu da əsasən filmləri ilə dinini yaşamayan müsəlmanlara öyrətdilər. Bu ideologiyalardan biri də haqsız yerə insanı öldürmək və bunu Allahın adından istifadə edərək yerinə yetirməkdir. Allahın adı ilə insan öldürən Qiyamət günü Allaha necə cavab verəcəyini düşünmədən, şeytana aldanaraq böyük günah işlədib insan öldürdü. Necə ki, ilk dəfə ölüm hadisəsi iki qardaş arasında baş verdi. Belə ki, ilk dəfə Allah tərəfindən nəziri, sədəqəsi qəbul olunmayan Qabil Allah tərəfindən nəziri, sədəqəsi qəbul olunan Habili haqsız yerə öldürdü. Bununla Qabil öz nəfsinə və şeytana tabe olub ilk qətli törətdi. Beləliklə ondan sonra öldürənlərin hamısının günahından Qabilə də bir günah yazılır. Çünki, Qabil bir insan öldürmək kimi böyük bir günaha cığır açdı.

Bu gün öz bacısını öldürən qız da öz nəfsinin və şeytanın günahını Allahın üstünə ataraq qeyd edir ki, Allah bacımı öldürməyi mənə bildirdi. Məgər Allah təala bir insanı öldürmək üçün insana əmr verərmi? Həm də öz bacısını öldürmək əmrini? Bu qatil qıza o təlqinləri verən Allahın düşməni şeytan olmuşdur. Çünki Allah təala haqsız yerə öldürməyi haram etmişdir. Allah təala buyurur: “Hər kəs bir mömin şəxsi qəsdən öldürərsə, onun cəzası əbədi qalacağı Cəhənnəmdir. Allah ona qəzəb və lənət edər, (axirətdə) onun üçün böyük əzab hazırlar!” (Nisa surəsi 93). Allah təala qəsdən adam öldürən əvvəlki ümmətlərdən olan yəhudilər haqqında belə buyurmuşdur: “Buna görə də İsrail oğullarına (Tövratda) yazıb hökm etdik ki, hər kəs bir kimsəni öldürməmiş (bununla da özündən qisas alınmağa yer qoymamış) və yer üzündə fitnə-fəsad törətməmiş bir şəxsi öldürsə, o, bütün insanları öldürmüş kimi olur. Hər kəs belə bir kimsəni diriltsə (ölümdən qurtarsa), o, bütün insanları diriltmiş kimi olur. Bizim peyğəmbərlərimiz onlara (İsrail oğullarına) açıq möcüzələr gətirmişdilər. Bundan (bu möcüzələrdən) sonra da onların bir çoxu yer üzündə (küfr, qətl və cinayət etməklə) həddi aşdılar” (Maidə surəsi, 32). Allah təala bu və ya başqa ayələrdə insan öldürməyi haram etmiş və bunun cəzasının böyük olduğunu bildirmişdir. Allah təala buyurur:  “(Ya Rəsulum!) De: “Gəlin Rəbbinizin sizə nələri haram etdiyini deyim: Ona heç bir şərik qoşmayın; ata-anaya yaxşılıq edin; kasıblıq üzündən uşaqlarınızı öldürməyin. Sizin də, onların da ruzisini Biz veririk. Açıq və gizlin pis işlərə yaxın düşməyin. Allahın (qətlini) haram buyurduğu cana qıymayın (müsəlman və ya əhli-zimməni haqsız yerə öldürməyin). (Allah) bunları sizə tövsiyə etmişdir ki, bəlkə, düşünüb anlayasınız!” (Ənam surəsi, 151). Bu ayədə də gördüyümüz kimi Allah təala öldürməyi haram və qadağan etmişdir.  Başqa ayədə uca Allah qətli belə qadağan edir: “Allahın haram buyurduğu cana haqsız yerə qəsd etməyin. (Onu yalnız və yalnız böyük bir günah işlədikdə, məsələn, iman gətirdikdən sonra küfrə düşdükdə, yaxud zinakarlıq etdikdə öldürmək olar). Haqsız yerə öldürülən məzlum bir şəxsin sahibinə (və ya varisinə qatil barəsində) bir ixtiyar verdik (istəsə, qatildən qisas alar, istəsə, bağışlayar və ya qanbahası tələb edər). Lakin o da qətl etməkdə ifrata varmasın (qisas almalı olsa, yalnız qatili öldürməklə kifayətlənsin)! Çünki (şəriətin bü hökmləri ilə) ona artıq kömək olunmuşdur” (İsra surəsi, 33). Biz bu ayələrə və başqa ayələrə baxdıqda görürük ki, Allah təala haqsız yerə adam öldürməyi qadağan etmişdir. Bununla bağlı çoxlu hədislər də vardır. Allahın rəsulu səlləllahu aleyhi və səlləm tərəfindən günahsız insanların və hətta heyvanların, həşəratların belə öldürülməsi qadağan olunmuşdur.

Belə olduqda bir şeytana aldanan qızın bacısını öldürməsi və bunu Allahın adından deməsi tamamilə o qızın ruhi cəhətdən şeytanların əhatəsində olduğunu göstərir. Allah təala heç vaxt günahsız insanı öldürməyi heç kimə əmr etməz. Allah təala öz qullarına qarşı rəhmət və mərhəmət sahibidir. Öldürən də, dirildən də Allahdır. Allah daha doğrusunu bilir.