Məhərrəmlikdə toy, Aşura günü ehsan yeməli, yoxsa oruc tutmalı?!

 Məhərrəm ayında toy eləmək haqqında islamda heç bir qadağan yoxdur. Buna aid heç bir səhih, etibarlı Quran ayəsi, Allah Rəsulun hədisləri, buna aid əhli beytdən gələn heç bir xəbər yoxdur. İslam tarixini oxuyun.

Allah Rəsulunun övladları, ailəsi, səhabələri və əhli beyti Məhərrəm ayında övladlarını evləndiriblər. Sadəcə bu gün toylarımız islam dininə uyğun olmadığı üçün təkcə Məhərrəmdə yox, digər vaxtlarda da islama uyğun toylar etmək lazımdır. Bu da ayrı bir mövzudur. Əgər biz İmam Hüseynə belə hörmət ediriksə onun atasına da, babasına da belə hörmət etməliyik. Dini yas dininə çevirmək qətiyyən olmaz. Əgər biz Kərbalada olan döyüşü yasa çeviririksə onda gərək Uhud döyüşünü də yasa çevirək, onda gərək Xəndək döyüşünü də yasa çevirək, onda gərək Allah Rəsulunun səlləllahu aleyhi və səlləmin iştirak etdiyi və Allah yolunda ölən digər ona iman edənlərin də şəhidliyi üçün yas keçirək. Axı bunu nə Allah əmr edib, nə Allah Rəsulu səlləllahu aleyhi və səlləm belə edib, nə belə etməyi ümmətinə deyib? Belə şeylər islamda yoxdur. İslamda 3 gündən artıq yas saxlamaq yoxdur. Vallah yoxdur.

Əgər biz imam Hüseyn (Allah ondan razı olsun) məktəbi adı altında yas saxlamağı, mərsiyə deməyi, rozə deməyi, meyxana deməyi, mahnı oxumağı, özümüzü döyüb qan çıxarmağı məktəb hesab ediriksə onda etiraf edək ki, islamda olmayan batil bir cərəyana qoşulmuşuq. Əgər siz şəhidliyi yalnız İmam Hüseynə aid edirsinizsə yenə səhv yoldasınız. Məgər islamda imam Hüseynə (Allah ondan razı olsun) qədər şəhidlər olmadımı? Allah Rəsulunun ilk dəvətində Allah Rəsulun özünün şəhid dediyi böyük şəxsiyyətlər olmadımı? Əmisi Həmzə şəhid olmadımı? Niyə Allah Rəsulu səlləllahu aleyhi və səlləm matəm elan etmədi, ya da demədi ki, matəm elan edin, ya digər əhli-beyt niyə bunu etmədilər. Ya da lap əvvələ peyğəmbərlərə qayıdaq. Niyə peyğəmbərlərin çoxu Allaha dəvət etdikləri üçün şəhid edildilər, amma Allah təala digər peyğəmbərlərə əmr etmədi ki, onlara yas saxlayın, onlara ağlayın və s. Ölən üçün ağlamaq olar. Amma bunu matəmə, hüznə, yasa çevirmək olmaz. İmam Hüseynin (Allah ondan razı olsun) məktəbi adı altında islamda olmayan hərəkətlərin təbliği yol verilməzdir. Əgər onun məktəbin getmək istəyiriksə onun nəsihətlərini oxumalıyıq, babasının bizə qoyub getdiyi əmanəti qorumalıyıq, onun babasına gələn vəhyin dilin öyrənib oxumalı və təbliğ etməliyik. İmam Hüseynin (Allah ondan razı olsun) məktəbi böyükdür. Onun məktəbi adı altında bədənə zərər vurmağı, başı yarmağı, şaxsey vaxsey deməyi, hər şeyi qara etməyi, etirazı, narazılığı, hakimiyyətə qarşı çıxmağı təbliğ edənlərə aldanmaq olmaz. Onun məktəbi Allaha və sonra göndərdiyi Rəsuluna təslim olmaq, iman etmək, gücün çatan qədər itaət etməkdir. Bəzi firqələr hələ onun məktəbini oxumaq istəmirlər. Kor-koranə kimlərisə təqlid edirlər. Belə edənlər var, olsunlar, amma artıq müsəlmanların çoxu bunun batil olduğunu dünyanın hər yerində və vətənimizdə anlayırlar.

Siz dedikləri sözə baxın. Bütün Məhərrəm ayı boyu oruc tuta bilərsiniz, ancaq Aşura günü günortaya qədər tutmalısınız. Aşura günü günorta ehsan veriləcək, ona görə də yemək lazımdır. İmam Hüseyni sevdiyini, onun məktəbindən danışan biriləri bu inancdadırlar. Məhz İmam Hüseyn xatirinə bunu etdiklərini qətiyyən düşünməyin. Onun xatirinə olsaydı Aşura günü axşama qədər onun yolunda ac qalardılar. Onun adına ehsan verəcəklər. Ehsan yaxşılıq etmək deməkdir. İmam Hüseynə görə yox, Allaha görə həmişə ehsan ver. Adi, şüursuz insan da bilir ki, ehsan Allah üçün verilir. Özü də ehsan təkcə yeməkdən olmur. Kim Aşura günü oruc tutursa o da Allah üçün bir ehsan vermiş sayılır. Nəysə. Düzələn deyil.
Hələ üstəlik Aşura günü oruc tutanlara böhtan atırlar. Bu gündə oruc tutanları iddiham edirlər. Bunlar Allahdan qorxmurmu? Axı Aşura günü ehsan vermək yox, oruc tutmaq əhli-beyt tərəfindən rəvayət olunub. İmam Hüseynin məktəbinin doğru yolda olan davamçıları İmam Hüseynə yas saxlamaq əvəzinə həmin günə uyğun olaraq və İmam Hüseynin yolunu tutaraq həmin gündə oruc tuturlar. Bu barədə özlərini əhli-beyt tərəfdarları adlandıran şiə rəvayətçilərindən də səhih və etibarlı xəbərlər gəlmişdir. Biz həmin rəvayətlərdən bir neçəsini sizin diqqətinizə çatdırırıq. Sizə elə təkcə əhli-beytən Aşura günü oruc tutmaq haqqında olan rəvayəti qeyd edirik.
Əhli Şiələrin ən mötəbər alimlərindən olan Əbu Cəfər ət Tusinin “əl-İstibsar” (2/134) kitabında və Hurr Amilinin “Vəsailuş şia” (7/337) kitabında bu gündə oruc tutmanın fəziləti ilə bağlı hədislər nəql olunmuşdur.
İmam Əbu Abdullah (ə.s) (Cəfəri Sadiq) imam Əli (ə.)-dən rəvayyət edir: “Aşura günü 9-cu 10-cu gün oruc tutmaq keçən ilin günahlarını silir və kimsə səhvən yeyib-içsə, orucunu pozmasın.” (Nuri Təbərsi ”Mustədrək əl Vəsail” 1/594)
Basqa bir rəvayətdə də İmam Əli (ə.s) Aşura günü orucunun fəziləti haqqında yenə buyurmuşdu: “Muhərrəm ayının doqquzuncu ve onuncu günü oruc tutun. Çünki, bu bir illik günahların kəffarəsidi.” (əl-istibsar 2-cild səhifə 134)
İbn Abbas dedi: “Əgər siz Muhərrəm ayını görsəniz, saymağa başlayın. Ayın doqquzu olduqda oruc tutmaq üçün yuxudan qalxın. Ravi soruşdu: “Muhəmməd Peygəmbər (s.a.s) belə oruc tutardı?
İbn Abbas dedi: “Bəli”
(Hurr Amili “Vəsailuş şia” 7/347; Nuri Təbərsi “Müstədrək”c.1,səh 594)
İmam Əbu Cəfər (Muhamməd Bağir) deyir: ”Aşura gününün orucu bütün ilin günahlarını silir.” (Tusi “Təhzib” 4/300; “İstibsar” 2/134; Kəşani “Vafi” 7/13)
“Peyğəmbər (s.a.s) Aşura günü oruc tutardı.” (Tusi “Təhzib” 4/29; “İstibsar” 2/134; “Vəsailuş şia” 7/337)