Özünü həzrət elan edənlərin tənqidi

Dəyərli ziyalılar və hörmətli media mənsubları. Bir həftəyə yaxındır ki, ANS televiziyasının “Adm İçində” verlişində adi bir şəxsin özünü “həzrət adlandırması və çox hörmətli ANS televiziyasının rəhbərliyi, təşkilatçıları, kollektivi və aparıcısı, hörmətli Elgiz bəyin bu şəxsi həzrət kimi qəbul edib həzrət təxəllüsü ilə ictimaiyyətə təqdim etməsi, bu şəxsin özünü həzrət adlandırmasına göz yummaları ictimai qınağa səbəb olmuşdur. Bununla bağlı olaraq mənə sosial şəbəkələrdən məktublar gəlir, zənglər olunur və bu barədə ziyalı təbəqədən məndən münasibət bildirməyim xahiş olunur. Mən nə qədər üç gün ərzində cəhd etsəm də verliş gedən ərəfədə və özünü həzrət elan edən Sabir adlı şəxsin həmin verlişdə olmasından istifadə edib canlı yayımla telefon bağlantısı qura bilmədim. Bu məsələ ictimaiyət arasında ciddi narazılığa səbəb olduğu üçün bu yazını yazmağa və həzrət sözünün lüğət mənasını verməyə çalışdım və ümumi islam alimlərinin bu barədə mövqeyini bildirməyi vacib hesab etdim.

Əvvəlcə qeyd edim ki, “həzrət” sözünü hər adama demək düzgün deyil. Bu əslində böyük bir mövzudur. Ama mən qısaca açıqlama verim ki, bilməyənlər bilsin. Özünə Allah tərəfindən vəhy gəlməyən, Allahın təmizə çıxarıb özü haqqında vəhy nazil etmədiyi kimsəyə həzrət demək sadəcə həm həmin adamın təhqir olunması, eyni zamanda müqəddəslərin təhqir olunması deməkdir. Kim bu özünə həzrət deyən şəxsin müqəddəsliyini sübut edə bilər. Bu qədər də şişirmək böyük günahdır. Əvvəlcə həzrət sözünün lüğəvi mənasını qeyd edim. Həzrət - uca qəbul edilən şəxslərin adlarının əvvəlinə onlara hörmət mənasında, həmin özünə həzrət deyilən şəxsi öymək, tərifləmək, onu uca tutmaq, onun şənini başqalarından böyük tutmaq məqsədi ilə deyilən bir sözdür. Ərəb-dilindən alınma bir sözdür. Hüzur sözündən yaranıb. Təsəvvüf əhli, yəni sufilər də bu sözü peyğəmbərlərə və ardıcıllarına deyiblər. İslam alimləri bu sözün hər kəsə, yəni kimə gəldi deilməsini icazəli hesab etməyiblər. İslam alimlərinə görə həzrət sözünü ancaq Allahın seçib, özünə vəhy etdiyi, insanlar tərəfindən möcüzələrinin və kəramətlərinin göründüyü, Allaha bağlı olan şəxslər üçün deyilməsi daha məqsədə uyğun hesab ediblər. Bəzi alimlər isə bu sözün ancaq Allaha xas olduğunu bildiriblər. Çünki tərif, ucalıq, əzəmət ancaq Allaha məxsusdur.

Bəzi alimlər hörmət mənasında Qurana da həzrəti Quran deyiblər. Elə bir dahi islam alimi yoxdur ki, ona həzrət desinlər. Bu söz ancaq peyğəmbərlərə və onların ardınca gedən şəxslərə deyilib. Bu kişiyə həzrəti demək həqiqətən də müqəddəsləri təhqir etməkdir. Çünki belə adi bir şəxsdə xüsusi Allaha xas üstün keyfiyətlər yoxdur. Çox xahiş edirəm ki, bu məsələdə diqqətli olaq və daha ədalətli mövqeni nümayiş etdirək. Çünki, belə şəxslərə həzrət demək Allahın seçdiklərini təhqir etmək kimi çıxır. Xahiş edirəm bu sözdən hörmətli aparıcımız da çəkinsin. Ən azından özünü günahdan qorumuş olar.

Bu mövzu günlərdir ki, sosial şəbəkələrdə geniş müzakirə olunur və məndən ilahiyatçı kimi mövqe bildirməyim xahiş olunur. Bu səbəbdən məndə sosial şəbəkələrdə müzakirələrdə iştirak etməyə məcbur oldum. Nəticədə özünə həzrət deyən Sabir adlı şəxsin şərhlərini də oxudum və bu qənaətə gəldim ki, özünə həzrət deyən şəxsin həqiqətən də psixoloji problemləri var. Çünki bu şəxs iddia edir ki, hər kəs onun əlindən öpməlidir. Həmçinin bildirir ki, onu bütün dünya tanıyır və reklama ehtiyacı yoxdur. Həqiqətdə onun yazılarını oxumağa vaxt ayırmaq istəmədim.Özü ilə bağlı böyük iddialarını sona qədər oxumağa səbrim çatmadı. Çünki bu özünü həzrət elan edənin sözlərinə baxanda gördüm ki, Allah Rəsulu səlləllahu aleyhi və səlləmin yolunu, metodunu izləyən, onu tanıyan biri deyil. İnanın ki, elə bir insanla mübahisə etmək, söz güləşdirmək vaxt itkisi deməkdir. Allah Rəsulunu Allah seçmisdi. Ona xususi olaraq vəhy gəlmisdi. Ancaq Peyğəmbərin əxlaqına baxın ki, o məclisə gələndə ayağa qalxmaq istəyən səhabələrə dedi ki, birdə mən gələndə qalxmayın, məndə sizin kimi bir insanam. Sadəcə mənə vəhy gəlir. Onun əlini öpmək istəyən səhabədən isə bu təklifi rədd etdi. Bildirdi ki, bütün təriflər Allaha məxsusdur. Bunu nəzərə alın ki, peyğəmbərlik xətm olunmusdur. Artıq Allah rəsulu səlləllahu aleyhi və səlləmdən sonra peyğəmbər gəlməyəcək və heç kimə vəhy gəlməyəcək. Ancaq Qiyamətə yaxın İsa əleyhissalamın qayıtması baş versə də, Mehdi əleyhissalam gəlsə də, onlar Allahın Kitabı olan və Məhəmməd peyğəmbərə (səlləllahu aleyhi və səlləm) nazil olunan Qurani Kərimlə və peyğəmbər hədisləri ilə hərəkət edəcəklər. Daha bir yalançı, özünü həzrət qəbul edən psixoloji problemli ANS-in “Adam İçində” verlişində iştirak edən Sabir adlı şəxs insanların onu ucaltmasını və əllərindən öpməsini tələb edir. Bu da onun və əməllərinin islamdan uzaq olduğunu göstərir. Özünə həzrət təxəllüsü verən Sabir bəy, yaxşı adam ola bilər, insalara yaxşılıq edə bilər, bir neçə nəfəri özünün de dediyi kimi həcc ziyarətinə göndərə bilər, amma özünə həzrət deməsi üçün o peyğəmbər olmalıdır. Digər insanlardan özünü üstün tutaraq özünü müqəddəsləşdirmək belə adi bir şəxsə yaraşmaz.

Ümummilli liderimiz Heydər Əliyev (Allah ona rəhmət etsin), hörmətli prezidentimiz cənab İlham Əliyev əsl həzrət adına layiq olduqları halda heç onlar özlərinə həzrət demirlər və buna müsbət yanaşmırlar. Bütün Qafqazın şeyxi Hacı Allahşükür Paşazadə belə özünə həzrət təxəllüsü götürmədiyi halda adi bir şəxsin özünü belə adlandırması nə islama uyğundur, nə də bizim ictimaiyətə uyğun deyildir. Bununla bağlı QMİ-də öz açıqlamasını bildirməlidir. Çünki bu məsələ ictimai qınağa səbəb olub və bir neçə gündür ki, sosal şəbəkələrdə narazılığa səbəb olub.

İslam alimləri belə özünü həzrət élan edən şəxslərdən ünsiyyət etməyi insanlardan çəkindiriblər. Çəkinilməsi vacib olan şəxsin efirlərə çıxarılması, reklam edilməsi heç bir qaydaya sığmır. Ümumiyətlə özünü həzrət élan edən Sabirin dedilərinin islamla heç bir yaxından və uzaqdan əlaqəsi yoxdur. Bu məsələdə yenə də verlişin aparıcı həzrət sözünü işlətməməsi məsələnin müsbət həllinə yol açacağına ümid edirik.