“MÜSAVAT”IN SEÇKİDƏN İMTİNA QƏRARI ONUN MARGİNAL QRUP VƏ SİYASİ AUTSAYDER OLDUĞUNU NÜMAYİŞ ETDİRDİ

Azərbaycan siyasi palitrasında heç bir funksionallığa malik olmayan qüvvələr, başqa sözlə, bir qrup autsayderlər özlərinin korporativ səciyyəli maraqlarını, şəxsi ambisiyalarını təmin etmək üçün siyasi dəyərlərə zidd fəaliyyət göstərməkdədirlər. Başqa sözlə, siyasi palitrada marginal qrup və autsayder kimi tanınan, xalqın etimadını tamamilə itirmiş bu cür qüvvələr hər zaman müxtəlif oyunlar və primitiv məsələlərlə gündəmə gəlməyə çalışmaqdadırlar.

Bu cür marginal qruplar sırasında özlərinin siyasi səriştəsizliyi sayəsində autsayderə çevrilmiş şəxsləri birləşdirən Müsavat Partiyası da yer alır. Bir müddət öncə parlament seçkilərində “mübarizə” aparacaqlarını, seçkilərdə mütləq iştirak edəcəklərini deyən bu partiyanın nümayəndələri indi fərqli bəyanatlar səsləndirirlər. Siyasi partiya adlandırılan bu marginal qrupun seçkilərin keçirilməsinə 3 gün qalmış seçkidə iştirakdan imtina etdiyini açıqlaması onun marginal qrup oldunu bir daha təsdiqləyir. Çünki birincisi, sosial bazası və rəqabət aparmaq üçün yetərli siyasi resursları olan hər hansı bir partiya boykot əvəzinə mübarizəni seçir. Yəni “Müsavat”ın bu qərarı həm də siyasi subyektlər üçün siyasi etikaya zidd addım kimi xarakterizə edilir. İkincisi, bu məsələlərlə bağlı qəbul edilən hər bir qərar yerli qanunvericiliyə - ölkə Konstitusiyasına uyğun olmalıdır. Azərbaycan Respublikası Seçki

Məcəlləsinin 154.1-ci maddəsinə əsasən, siyasi partiya öz nizamnaməsinə uyğun olaraq, siyasi partiyaların bloku isə ona daxil olan siyasi partiyaların səlahiyyətli nümayəndələrinin qərarı ilə səsvermə gününə ən geci 10 gün qalanadək istənilən vaxt müvafiq dairə seçki komissiyasına yazılı ərizə verərək, birmandatlı seçki dairəsi üzrə irəli sürülmüş namizədi, qeydə alınmış namizədi geri çağırmaq hüququna malikdir.

Yeri gəlmişkən, bu partiyanın “parlament seçkiləri 4 aydan sonra keçirilsin” bəyanatı isə ölkə Konstitusiyasına və seçki qanunvericiliyinə zidd olmaqla yanaşı, həm də bir sıra məqamları ifadə edir. Bu məqamda qeyd etmək lazımdır ki, Azərbaycan Respublikasının Konstitusiyasının 84-cü maddəsinin II hissəsinə uyğun olaraq, Azərbaycan Respublikası Milli Məclisinin hər çağırışının seçkiləri hər beş ildən bir noyabr ayının birinci bazar günü keçirilir və onun iddia edilən müddətə və əsaslarla təxirə salınması qaydası seçki qanunvericiliyində ümumiyyətlə nəzərdə tutulmamışdır.

Bu mövqe, ilk növbədə, ondan xəbər verir ki, məqsəd ölkəmizdəki demokratik mühitə kölgə salmaq, Azərbaycanın pozitiv imicinə xələl gətirməkdir. Görünən odur ki, xalqın etimadını heç cür qazana bilməyən və fəaliyyətini qərəzli xarici dairələrin dağıdıcı maraqlarının təmin olunması missiyası üzərində quran autsayderlər son zamanlar, özəlliklə də parlament seçkiləri ərəfəsində ictimai rəydə spekulyasiya yaratmaq, təkmil struktur elementlərinə malik olan və möhkəm əsaslara söykənən siyasi sistemin sabitliyi məsələsini manipulyasiya predmetinə çevirmək üçün ən müxtəlif metodlara istinad edirlər. Bu isə, öz növbəsində, həm də siyasi təxribat kimi səciyyələndirilə bilər. Bir sıra ölkələrin təcrübəsindən də bəllidir ki, seçkilərdə iştirak etmək üçün heç bir resursa,

xüsusilə də sosial bazaya malik olmayan marginal qruplar bu cür siyasi təxribatlara istinad edirlər...

Beləliklə, sadalananlar heç bir ictimai dəstəyə, sosial bazaya malik olmayan “Müsavat”ın siyasi palitrada autsayder kimi çıxış etdiyini bir daha nümayiş etdirir. Bu kontekstdə digər bir nüans ondan ibarətdir ki, bəhs olunan partiyanın seçkilərdən imtina ilə bağlı qərarı həm də var olduğunu iddia etdiyi seçicilərinə qarşı həqarətdir. Normal-funksional siyasi partiya seçkilərə qatılaraq elektoratının iradəsini ifadə edir və seçicilərlə münasibətdə ictimai-siyasi palitrada müəyyən olunmuş vəzifələrini yerinə yetirir. Amma müxalifətçiliyi peşə və ya ştat vahidinə çevirməyə çalışan “Müsavat”ın sərgilədiyi mövqe bəhs olunan yanaşma və meyardan uzaq olmaqla yanaşı, onun marginal qrup kimi siyasi proseslərdə nə qədər aciz və təsirsiz olduğunu göstərir.