İnsanın ağlı onun əxlaqı və ədəbi ilə ölçülür və ya baş vermiş bir hadisəyə sözardı

        Ötən həftənin son günlərində  DİN-nin Yol Patrul хidmətinin  əməkdaşı C.Qasımovun DİO-dan xaric olunması ətrafında bir-birinə zidd oxucu və jurnalist münasibətləri KİV-də özünə yer alıb.

Məlumata görə Müdafiə Nazirliyinin ali rütbəli zabitlərindən olan N. Sadıqovun oğlu – dövlət qulluğunun  xüsusi növündə çalışan  M. Sadıqovun( sürücü kimi) kobud hərəkətlərinə qanuni reaksiya vermiş yol patrul xidmətinin əməkdaşı   ciddi tənbeh edilərək vəzifəsindən azad edilmişdir.

Bütün bunlar YPX əməkdaşının  və Vergi Orqanının məsul işçisinin dövlətin etibar etdiyi səlahiyyətlərdən düzgün istifadə edə bilməməsinin nəticəsidir.

Əvvəla, polis əməkdaşı onun qanuni tələbinə tabe olmayan şəxsin əməli barədə qanuni tədbir görməyi, qarşı tərəfin qıcıqlandırıcı hərəkətlərinə səbr nümayiş etdirməyi və  müvazinətini qoruyub saxlamağı bacarmalıdır. Öz hüquq və vəzifələrini səhih bilməyən polis əməkdaşı və yaxud vətəndaş-məmur ekstremal şəraitlərdə çıxış yolunu tapmaqda həmişə çətinlik çəkəcək. (Xatırlamaq yerinə düşərdi: Ötən il Leyla Yunus yüksək rütbəli polis zabitinin dövlətin simvolu olan papağını yerə atıb nümayişkaranə şəkildə tapdalamışdı. Polis məmuru müvazinətini saxlayıb heç bir artıq hərəkətə yol verməmişdi. Qənaətimə görə həmin olaya ictimai qınağın olmaması vətəndaş  biganəliyin təzahürü idi.Təəssüfləndim...)

Vergi orqanının səlahiyyətli şəxsi isə DİN əməkdaşının qanuni tələblərinə sözsüz tabe olmalı və mövcud hüquqpozma barədə DİN-nin rəhbərliyinə müraciət edə bilərdi.  Hər iki tərəfinin hüquqi kasadlığı ucbatından hörmətsizlik halları yaşanmış, Dövlət Qulluğunun xüsusi növündə çalışan qulluqçuların etik davranış qaydalarında ehtiva edilən etik və mədəni davranışlara  riayət olunmamışdır.

Hər şey də məhz əxlaq, tərbiyə və mədəniyyətdən, onun səviyyəsindən asılı olaraq başlayır.

Rəvayət edilir ki, Buxara şəhərində  bir pasiyent müayinə üçün həkimin yanına gedir. Həkim pasiyentə uzanmağı buyurur.

Xəstə isə həkimin işarə etdiyi səmtə yox- “Olarmı bu tərəfə uzanım?” – soruşur.     

Həkim: Fərqi yoxdur, təki  “təslim ol”- deyir.

Müayinədən sonra həkim:

-         Niyə mən göstərdiyim tərəfə uzanmaq istəmədin? Fərq nədəydi? – deyə soruşur.

-         Həkim,  göstərdiyin tərəfə uzanmadım ona görə ki, müəllimimim evi o səmtdə idi. Mən ona hörmətsizlik edə bilməzdim...

İnsanın ağlı və təfəkkürü onun mədəniyyəti, əxlaqı və tərbiyəsi ilə tamamlanır. Alimin də əxlaqı yoxsa, onun elminə ehtiyac duyulmaz.

Ramazan ayı olduğuna görə bunları söylədim.

 Polis xidmətində qanunların tələbi çərçivəsində davranmalı, vətəndaşlara qarşı nəzakətli olmalıdır. Vətəndaş – məmur da dövlətin simvolları ilə bəzədilmiş geyimin sahibinə, icimai qaydaların qorunmasının keşiyində dayanan səlahiyyətli şəxsin tələbinə tabe olmağını özünə sığışdırmalıdır.Tutulan mövqedən asılı olmayaraq hər kəs qanunun və hüququn aliliyi qarşısında boyun əyməlidir.

Hələ bu azmış kimi “Nazir öz işçisini müdafiə edə bilmədi”  yazılar və olayla bağlı qeyri dəqiq məlumatlar, şərhlər dərc edilir. Bu da, əxlaq göstəriciləridir. Hadisəni təfərrüatı ilə bilmədən nə isə yazmaq, münasibət bildirmək,  nazirə də xitab etmək, ictimai rəyi başqa səmtə yönəltmək, çaşqınlıq yaratmaqdır. Cəmiyyətdə baş verən hər cürə deviant davranışlar cəmiyyətin məhsulu kimi əxlaqın və tərbiyənin səviyyəsindən asılı olaraq yaranır.

Mən, QHT rəhbəri kimi hər zaman polis əməkdaşlarının hüquqlarının müdafiəsini təmin etmək üçün hazıram.Təki, müraciət etsinlər.

Kiçik insidentlərin üfürülüb ojiotaj yaratmağın  da tərəfdarı deyiləm. Polisin cinayətkarlıqla mübarizədəki peşəkarlığı, insan hüquq və azadlıqlarına hörmət ruhunda davranması 20 il öncə olan vəziyyətdən çox fərqlidir.

Bunun canlı təzahürü kimi artıq başa çatmış Avropa Oyunlarının insidentsiz ötüşməsini göstərmək yetər. Hər şey nəzarətdə olmaqla, müraciətlərə çevik yanaşma nəticəsində peşəkar və ayıq-sayıq asayış keşikçilərinin xidməti səmərə verdi.

Dərc olunanlar mahiyyətcə kiçikdir. Kiçikdir ona görə ki, ölkə prezidenti Möhtərəm İlham Əliyev bu barədə öz sözünü deyib və məmur övladlarının hədlərini aşmasına ciddi reaksiya verilir. Sadəcə səbr etmək  ədəbdən irəli gəldiyinə görə hamı iradə nümayiş etdirə bilmir.

Heç nə unudulmayıb və heç kim yaddan çıxmayıb. Səbr edək, hissə qapılmayaq...