DAĞLIQ QARABAĞ KRIM DEYİL ...

  Son dövrlərdə Ukraynada baş verən dramatik hadisələr postsovet məkanında çoxdan davam edən və hazırkı zamanda dondurulmuş vəziyyətdə öz həllini gözləyən milli münaqişə ocaqlarında canlanmaya səbəb olmuşdur.  Xüsusən Krımın Ukraynadan ayrılaraq Rusiya tərkibinə daxil edilməsi həmin məkanda mövcud olam münaqişə tərəflərinin hər biri tərəfindən özünəməxsus şəkildə qiymətləndirilir.  Konkret olataq, Krım hadisələri ilə bağlı gündəmə gətirilən, onunla müqayisə edilən münaqişələrdən biri də Dağlıq Qarabağ münaqişəsidir.  Artıq onilliklərdir ki davam edən Dağlıq Qarabağ münaqişəsinin səbəbləri, mahiyyəti, daşıdığı missiya, müxtəlif qüvvələrin buradakı maraqları, davam etmə məntiqi və digər məsələlər artıq heç kim üçün sirr deyildir. Dünya ictimaiyyəti bu münaqişənin bütün cəhətləri və xüsusiyyətləri barəsində kifayət qədər məlumatlıdırlar. Düzdür, bu aydınlıq heç də Azərbaycan həqiqətlərinin dünya ictimaiyyətinə çatdırılmasında arxayınlıq yaratmamalıdır. Belə ki, hər addımda bu həqiqətlərin təhrif edilməsi, faktların saxtalaşdırılmasına edilən cəhdlər göz qabağındadır. Bu cəhdlərin məqsədləri də bəllidir. Onların hər an diqqətdə saxlanılması və ifşa edilməsi Azərbaycan mütəxəssislərinin borcudur.

Artıq adət etmişik ki, Azərbaycanın xəritəsi  “səhfən”  qüsurlarla çap olunur, bu və ya digər mənbədə Qarabağla bağlı müxtəlif xarakterli materiallar  erməniləşdirilir.  Qarabağ münaqişəsinin həllində Azərbaycan üçün qəbuledilməz olan variantlar yeganə mümkün variant kimi təlqin olunur.  Çox kobud və açıq-aşkar şəkildə edilən bu saxtalaşdırmaların arxasında hansı maraqların dayandığını görməmək mümkün deyildir.

Ermənilər Krımda və Kosovoda həyata keçirilmiş siyasətin Dağlıq Qarabağda da tətbiq olunmasına ümid edir, bu hadisələri müqayisə edirlər. Lakin onların öz yazılarından da buna o qədər də ümid etmədikləri aydın olur. Onlar özləri də başa düşürlər ki, Qarabağ münaqişəsi başladığı gündən region dövlətlərinə təzyiq vasitəsi kimi törədilmişdi və onun bu və ya digər tərəfin xeyrinə həll edilməsi onun yaradıcılarının məqsədlərinə və taktiki planlarına uyğun deyildir. Dağlıq Qarabağın Krım nümunəsində tanınması isə erməni təbliğatçılarının əlində öz xalqını aldatmaq vasitəsindən başqa bir şey deyildir.

Rusiyanın siyasi dairələrində son vaxtlar səslənən fikir – Dağlıq Qarabağin  Rusiya Federasiyasına birləşdirilməsi ilə bu münaqişənin sona çatdırılması – baş qatmaq, diqqət yayındırmaq cəhdindən başqa bir şey deyildir. Rusiya siyasi həyatında qeyri ciddi hərəkətləri və fikirləri ilə seçilən şəxslər tərəfindən bu cür ideyaların səslənməsi müəyyən əhvali-ruhiyyəni ifadə etsə də, ciddi qəbul edilmir. Rusiya Dövlət Dumasının sədrinin müavini V.Jirinovskinin  Azərbaycan xalqı haqqında sərsəmləmələri, Qağlıq Qarabağın Rusiyaya birləşdirilməsi təklifləri bu qəbildəndir.

         Minsk Qrupunun  amerikalı həmsədri Geyms Uarlikin öz tvitter bloqunda münaqişə tərəflərini qarışıq salması əslində səhv deyildir, həmin şəxsin və təmsil etdiyi siyasi qrupların Azərbaycana münasibətdə tutduğu qərəzli mövqeyin büruzə verilməsidir. Bu fakt onların həyata keçirdikləri müssiyada gizli məqsədlərini ortaya qoyur və onun və təmsil etdiyi dövlətin bu qrupda təmsil olunmağa mənəvi haqqının olub-olmamasını gündəmə gətirir. Eyni zamanda bu, Azərbaycan tərəfinə reallıqları nəzərə almağın , dostunu-düşmənini daha yaxşı tanımağın vacibliyini bir daha təsdiq edir.