ERMƏNİ DƏYƏRLƏRİNƏ MİKOYAN RİŞXƏNDİ

Ermənilər dünyanın nadir xalqlarındandır ki, onlar öz milli birliklərini qoruyub saxlamaq üçün çıxış yolunu xəyali mövzuları milli dəyərlərə çevirməkdə və erməniliyi də bu "dəyərlər" ətrafında birləşdirməyə çalışmaqda görürlər. Məsələn, "Böyük Ermənistan", "erməni soyqırımı", "erməni istisnalığı" və s. Bura bəzi digər "dəyərləri" də əlavə etmək olar. Amma sadalanan "dəyərlər" ermənilər üçün baza "dəyərləridir" və onlar bir növ ermənilər üçün tabuya çevrilmişdir. Ermənilər bu həqiqətdən uzaq mövzular ətrafında o qədər təbliğat aparmışlar ki, indi artıq özləri də öz yalanlarını həqiqət kimi qəbul edir, bu yalanları toxunulmaz hesab edir və həmin yalanlar ətrafında birləşməklə erməni toplumunun milli kimliyini qoruyub saxlamağa çalışırlar.

Erməniliyin mahiyyətinə az-çox bələd olanlar bilirlər ki, yuxarıda sadalanan erməni "dəyərləri" qəlp dəyərlərdir və onların arxasında ciddi elmi-tarixi əsaslar dayanmır. Ermənilər arasında da bunu bilməyən yox deyil. Erməni millətçiləri gizlətməyə çalışsa da, həqiqətlərin qarşısını almaq da asan deyil. Məsələn, bu günlərdə erməni millətçiliyinin patriarxı sayılan və törətdiyi cinayətlərlə Azərbaycan xalqına yaxşı tanış olan Anastas Mikoyanın erməni dəyərlərinə rişxənd edən bir tezisi erməni mediasında işıq üzü gördü. " Qafqaz məsələsinə dair" adlanan bu tezis 1919-cu ildə A.Mikoyan tərəfindən hazırlanaraq V.İ.Leninə göndərilmişdir (http://www.lragir.am/print/rus/0society/print/36005). Bu tezislər erməni millətçiləri tərəfindən çox böyük qəzəblə qarşılandı və nəticədə indi Ermənistanda A.Mikoyanın şəxsiyyətinə qarşı ciddi müxalifətçilik formalaşmışdır. Elə bunun nəticəsidir ki, erməni millətçiləri İrəvan şəhərində A.Mikoyana abidə qoyulmasına qarşı çıxdılar və son nəticədə hazırlanan abidə də emalatxanadan naməlum şəkildə oğurlandı.

A.Mikoyan öz tezislərində "Böyük Ermənistan" mövzusunun imperialist təxribatı olduğunu və qərb dövlətlərinin öz maraqları naminə erməni şovinistlərinə sırandığını əsaslandırırdı. Məsələn, A.Mikoyan yazır ki, erməni şovinistləri imperialist müttəfiqlərin və general Denikin qaragüruhçularının köməyinə arxalanaraq "Böyük Ermənistan" xülyasına ümid bəsləyirlər. Onun fikrincə, bu xülyanın heç bir əsası yoxdur və bu xülyanı imperialist silahını gücü, çoxlu qan tökülməklə və müsəlman əhalini "erməni vilayətlərindən" təmizləməklə həyata keçirmək olardı. A.Mikoyan yazırdı ki, imperialist ölkələri bu dəhşətli planı həyata keçirməyə çalışmaqla ermənilərin şəxsində ən yaxşı, ən bacarıqlı və ən sadiq agentlər əldə etmək istəyirlər.

A.Mikoyan "Böyük Ermənistan" ideyasını dəstəkləyənləri erməni şovinistləri adlandırır və qeyd edirdi ki, Kommunist Partiyası istər "Böyük Ermənistan", istərsə də "Kiçik Ermənistan" ideyasını dəstəkləməməlidir. O öz fikrini də belə əsaslandırır ki, muxtariyyət hüququ tarixi iddialara görə deyil, real vəziyyətə uyun olaraq əldə edilməlidir.

A.Mikoyan tezislərinin bir neçə yerində "Böyük Ermənistan" iddialarını ortaya atmaqla kütləvi qırğınlara səbəb olan erməniləri "şovinistlər", "Antantanın agentləri" adlandırmışdır. O, hətta Türkiyə Ermənistanının müstəqilliyini tanıyan 1917-ci ilin dekabr dekretini də Sovet Rusiyasının çox böyük səhvi kimi dəyərləndirirdi. Qeyd edilirdi ki, bu dekretlə Sovet hakimiyyəti ermənilərin iddialarını qanuniləşdirməklə, müsəlmanların qanuni hüquqlarını ayaq altına almışdır. Bununla Sovet hakimiyyəti erməni şovinistlərinə dəstək verməklə müsəlman əhalini özündən uzaqlaşdırmışdır.

Erməni şovinistlərinin fəaliyyətini və bu fəaliyyətin bolşeviklər tərəfindən dəstəklənməsini dəyərləndirdikdən sonra A.Mikoyan aşağıdakı nəticəyə gəlirdi:

a)      Erməni milli hərəkatı öz dialektik inkişafı nəticəsində azadlıq hərəkatından əks hərəkata – təcavüzkar, gülməli olsa da işğalçı (imperialist) hərəkata çevrilmişdir;

b)     Türkiyə Ermənistanı və ümumiyyətlə "Böyük, Vahid və Müstəqil Ermənistan" ideyası ziyanlı, cinayətkar və təcavüzkar xülyaya çevrilmişdir ki, bizim partiya buna qarşı mübarizə aparmalıdır.

Göründüyü kimi, A.Mikoyan bir tərəfdən bu gün erməniliyi birləşdirən "dəyərlərdən" biri olan "Böyük Ermənistan" ideyasının qərb mənafeləri naminə  erməniliyə kənardan sırandığını əsaslandırır, digər tərəfdən də dolayısı yolla elə "erməni soyqırımının" da imperialist və erməni şovinist əməllərin nəticəsi olduğunu ortaya qoyur. A.Mikoyanın bu qənaətini doğru saymaq olar. Erməniləri isə məlumdur ki, doğru qənaətlər qane etmir və ona görə də bu gün erməni mətbuatında A.Mikoyanın özünə qarşı da təbliğat müharibəsi elan edilmişdir.