DOQQUZ GÜN ÖMRÜ OLAN ERMƏNİ YALANLARI

Əslində burada təəccüblü bir şey yoxdur. Çünki erməni informasiya-təbliğat  fəaliyyətinin əsas məqsədi erməni xəstə təfəkkürünün məntiqsiz iddiaları ətrafında yanlış  təsəvvürlərin formalaşdırılmasıdır. Malik olduqları informasiya vasitələri, maliyyə ehtiyatları və təsir imkanları ilə erməni millətçiləri bu istiqamətdə kifayət qədər fəaldırlar və müəyyən hallarda onların iddiaları qəbul da olunur. Amma diqqətlə izlənilərsə çox qısa zamandan sonra ciddi araşdırmalar aparmadan belə, bu iddiaların qondarma olmasını görmək elə də çətin deyildir. Bu, erməni informasiya-təbliğat fəaliyyətinin xüsusiyyətlərindən biridir. Çünki, erməni təbliğatı obyektiv meyarlara əsaslanmadığı üçün tezliklə onun yalanları üzə çıxır. Bunun üçün informasiya məkanına buraxılmış erməni hay-küyünü müəyyən müddət izləmək kifayətdir.

Bu mənada Suriyadakı Kasab erməniləri ətrafında yaradılmış erməni isterikası da növbəti bir nümunədir. Kütləvi informasiya vasitələrini izləyən şəxslərə yaxşı məlumdur ki, son zamanlar bu mövzu erməni və ermənipərəst informasiya vasitələrinin, habelə erməni lobbiçilərinin diqqət mərkəzindədir. Erməni təbliğatı az qala Suriyanın Türkiyə ilə sərhəd bölgəsində yerləşən Kasab qəsəbəsində baş verənləri dünyanın bir nömrəli probleminə çevirmək xəyalına belə düşmüşdülər. Bununla ermənilər Türkiyəyə qarşı məntiqsiz təbliğat aparılması üçün də bir mövzu əldə etmiş oldular. Ermənilərə qarşı türklər tərəfindən yeni "soyqırımının" həyata keçirilməsi, Kasab ermənilərinin öz yaşayış yerindən didərgin düşməsinin Türkiyənin həmin ermənilərə qarşı düşünülmüş siyasəti olması və digər uydurmalar erməni təbliğat maşınının fəallığı sahəsində dünya informasiya məkanında az qala ayaq tutub yeriyirdi. Ermənilər Kasab əhalisinə yardım üçün fondlar yaradılması, hesablar açılması, bu əhaliyə kömək göndərilməsi barədə uydurmalara da geniş məkan açmışdılar.

Lakin elə erməni məlumatlarını izləmək göstərir ki, məsələ heç də belə deyil. Doğrudur, son illər ərzində Suriyada qanlı hadisələr baş verir, burada bəşəri fəlakət mövcuddur və bu fəlakətin qarşısının alınması üçün Türkiyə tərəfindən də ciddi humanitar yardımlar həyata keçirilir. Ermənilərin millətçi hay-küylərinə baxmayaraq elə Kasab ermənilərinə ilkin yardımlar da ermənilər tərəfindən deyil, məhz Türkiyə tərəfindən çatdırılmışdır. Türkiyə humanistlik göstərərək öz yaşayış yerlərini itirmiş bir çox Kasab erməniləri Türkiyəyə gətirilərək onlara bəşəri yardımlar göstərmişdir.

Millətçilik zəhərində qovrulan ermənilər isə bunu etiraf etmək əvəzinə, Kasab ermənilərinin aldadılaraq Türkiyəyə gətirildiyini bəyan edirlər. Onlar hətta Kasaba hücum edənlərin Türkiyə sərhədindən gəldiyini və türk dilində danışdığını, başqa sözlə türklər olduğunu da iddia edirlər. Ona görə də, onlar Kasabın Suriya hakimiyyətinə müxalifət qüvvələri tərəfindən tutulmasını Türkiyənin ermənilərə qarşı növbəti soyqırımı kimi qiymətləndirilər. Məsələn, aparıcı erməni saytlarından biri Kasab ermənilərinə istinadən yazır ki, "bizim evlərimizi talan edənlər dağıstanlılardan, çeçenlərdən, liviyalılardan, somalilərdən, sudanlılardan ibarət idi. Onlar ərəb, türk və ingilis dilində danışırdılar". (www.panarmenian.net/rus/news/177877/. Amma diqqət yetirilərsə, görmək çətin deyil ki, adları çəkilən millətlərin nümayəndələrinin türk dili ilə heç bir bağlılığı yoxdur.

Kasab hadisələrinin başlanması ilə Ermənistan parlamentinin Dağlıq Qarabağdan olan deputatı Vaan Bədəsyan adlı birisi də Türkiyəyə qarşı millətçi təbliğata qoşulmaq fürsətini əldən vermədi. Hətta belə bir bəyanat da verdi ki, Dağlıq Qarabağdan 150 erməni könüllüsü Kasab ermənilərini qorumağa yollanacaqdır. Erməni səxavəti ilə söylənilən bu sözlərin arxasında sadəcə təbliğat mahiyyəti dayandığını sezmək heç də çətin deyil. Çünki, Dağlıq Qarabağda  150 könüllü tapmaq olsaydı, onlar Azərbaycana qarşı qazılmış səngərlərə göndərilərdi. Son illər ərzində bu səngərlərdə öldürülənlər hamısı Ermənistan vətəndaşlarıdır. Onların arasında yerli ermənilərin adına rast gəlmək mümkün deyil. Bu da ondan irəli gəlir ki, Dağlıq Qarabağ ərazisindəki cavan ermənilərin çoxu artıq bu bölgəni tərk etmişlər.

Bir neçə gündən sonra isə daha böyük təəccübə səbəb olan bir məlumat informasiya məkanına çıxarıldı. Guya, Kasaba yollanmaq üçün Suriyanın Tartus portuna 1500 Qarabağ ermənisi gətirilmişdir. Bu məlumat "Sehirli xalat" filmindəki bir ifadəni yada salır. "Əgər gopçular arasında yarış keçirilsəydi" erməni təbliğatçıları yəqin ki, birinci yer tutardı. Qeyd etmək lazımdır ki, bu məlumat Azərbaycan informasiya məkanında da kifayət qədər əks-səda doğurdu. Lakin yenə soyuq yanaşma onu deməyə əsas verirdi ki, Dağlıq Qarabağda gün-güzəranını qoyub sərbəst yolçuluqlara düşəsi bu qədər insan ehtiyatı yoxdur.

Tezliklə məlum oldu ki, doğrudan da belədir. Erməni ideoloqları bildirdilər ki, söhbət heç də yalnız Qarabağdan Kasaba erməni könüllüsü göndərməkdən getmir. Ortada könüllülərin Ermənistandan, Livandan və Arsaxdan topalanması haqqında erməni xülyaları vardır. Az sonra isə məlum oldu ki, Kasaba heç bir könüllü göndərilməyib. (www.armtoday.info/printnewsitem.asp?Lang=_Ru&NewsID=108291 ) . Heç göndərilməyəcək də. Çünki ermənilərin məqsədi Türkiyəyə və türkçülüyə qarşı təbliğat aparılması üçün mövzu əldə edilməsi və dünya ictimaiyyətinin diqqətini bu mövzuya  cəlb edilməsidir. Erməni təbliğat ənənələrinə istinad edərək demək olar ki, ermənilər heç Kasab ermənilərinin məsələsinin həllinin sorağında da deyildirlər. Əks təqdirdə türkçülüyə qarşı təbliğat mövzularından biri əldən çıxmış olardı.